Sumqayıt Regional Mədəniyyət İdarəsinə tabeli Abşeron rayon Mədəniyyət Mərkəzinin filialı Novxanı kənd Sənətkarlıq klubu və Abşeron rayon MKS-nin Novxanı kənd kitabxana filialının əməkdaşları növbəti dəfə Novruz bayramı ərəfəsində Vətən Müharibəsi qazisi Amil Faiq oğlu Əliyevi ziyarət ediblər. Amil Əliyev 25 may 1998-ci ildə Abşeron rayon Novxanı kəndində anadan olub. 44 günlük Vətən Müharibəsi zamanı Ağdərə, Suqovuşan istiqamətində şərəfli döyüş yolu keçərək, Suqovuşanın işğaldan azad edilməsində fədakarlıq nümayiş etdirib. Cəsur döyüşçü Ağdərə uğrunda gedən döyüşlərdə minaya düşərək ağır yaralanıb və üç gün komada qalıb. Həkimlərin bütün səylərinə baxmayaraq əfsuslar olsun ki, onun gözlərini xilas etmək mümkün olmayıb. Görüş zamanı qazi Amil kitabxana və klub kollektivinə 44 günlük Vətən müharibəsi dövründə keçdiyi döyüş yolundan danışıb. Azərbaycanın ərazi bütövlüyünün təmin edilməsi uğrunda igidlik və şücaət nümayiş etdirdiyinə görə Azərbaycan Respublikasının Prezidenti cənab İlham Əliyevin Sərəncamına əsasən Amil Əliyev "Suqovuşanın azad olunmasına görə", "Cəsur döyüşçü", "Vətən müharibəsi iştirakçısı" medalları ilə təltif edilib. Əməkdaşlar ailənin qayğıları ilə maraqlanıb, maddi və mənəvi dəstək olublar. Qazi və ailəsi göstərilən diqqət və qayğıya görə Ölkə Başçısına, müəssisə rəhbərliyinə öz təşəkkürlərini bildiriblər. Sonda xatirə şəkilləri çəkilib.

Allah şəhidlərimizə rəhmət, qazilərimizə isə şəfa versin!