Sumqayıt Regional Mədəniyyət İdarəsinə tabeli Abşeron rayon Mədəniyyət Mərkəzinin filialı Novxanı kənd Sənətkarlıq klubu və Abşeron MKS-nin 8 saylı Novxanı kənd kitabxana filialının əməkdaşları Vətən müharibəsi şəhidi Ceyhun Elşad oğlu Useynovun ailəsini ziyarət ediblər. Ceyhun Useynov 1990-cı il martın 9-da Abşeron rayonunda anadan olub. Azərbaycan Ordusunun kapitanı olan Ceyhun Useynov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi üçün başlanan Vətən müharibəsi zamanı Kəlbəcər və Cəbrayıl rayonlarının işğaldan azad olunmasında fəal iştirak edib. Ceyhun Useynov oktyabrın 6-da Cəbrayıl döyüşləri zamanı şəhid olub və Abşeron rayonunda dəfn olunub. Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulan tapşırıqların icrası zamanı vəzifə borcunu şərəflə yerinə yetirdiyi üçün Azərbaycan Respublikasının Prezidenti cənab İlham Əliyevin Sərəncamına əsasən Ceyhun Useynov ölümündən sonra "Vətən uğrunda", "Cəsur döyüşçü", "Cəbrayılın azad olunmasına görə", "Füzulinin azad olunmasına görə", "Kəlbəcərin azad olunmasına görə" medalları ilə təltif olunub. Ceyhun Useynov eyni zamanda "Azərbaycan Ordusunun 100 illiyi (1918-2018)" yubiley medalı, "Vətən müharibəsi iştirakçısı" və "Şücaətə görə" medalları ilə təltif edilib. Şəhidimizin anası oğlunun döyüş yolundan söhbət açıb, övladının göstərdiyi qəhrəmanlığa görə qürur hissi keçirdiyini, onunla fəxr etdiyini bildirib. Müəssisə əməkdaşları ailənin qayğıları ilə maraqlanıb, maddi və mənəvi dəstək olublar. Qəhrəmanımızın anası göstərilən diqqət və qayğıya görə Ölkə Başçısına, müəssisə rəhbərliyinə öz təşəkkürlərini bildirib. Sonda şəhidimizin anası ilə xatirə şəkilləri çəkilib.

Allah şəhidlərimizə rəhmət eləsin!