Sumqayıt Regional Mədəniyyət İdarəsinə tabeli Abşeron rayon MKS-nin direktor müavini Rəşidə Rzayeva şəhid Vüqar Elxan oğlu Məmmədovun ailəsini ziyarət edib. Görüş zamanı şəhidin həyat yolundan bəhs edilib. Şəhidin anası Elmira xanım Vətən müharibəsi zamanı oğlunun qəhrəmanlığından, şücaətindən böyük fəxr hissi ilə danışıb. O qeyd edib ki, Xaqan film tərəfindən çəkilən, Nəsimi rayonu şəhidlərinə həsr olunan "Qəhrəmanlıq Salnaməsi" adlı filmdə Vüqar Məmmədovun ömür yolu haqqında ətraflı məlumat verilib. Sonra Rəşidə xanım bildirib ki, bizlər bu gün rahat şəkildə yaşayırıqsa bunu, torpaqlarımız uğrunda canından keçən şəhidlərimizə və sağlamlıqlarını itirən qazilərimizə borcluyuq. Hər bir Azərbaycan vətəndaşı şəhidlərimizi daim ehtiramla yad etməli, qazilərimizə, müharibə iştirakçılarına və onların ailələrinə böyük hörmət, diqqət göstərməlidirlər. Vüqar Elxan oğlu Məmmədov 1991-ci il martın 28-də Bakı şəhərində anadan olub. Azərbaycan Ordusunun əsgəri olan Vüqar Məmmədov 2020-ci il sentyabrın 27-də Azərbaycan Silahlı Qüvvələri tərəfindən Ermənistan işğalı altında olan ərazilərin azad edilməsi və Azərbaycanın ərazi bütövlüyünün bərpa olunması üçün başlanan Vətən müharibəsi zamanı Füzulinin azadlığı uğrunda gedən döyüşlərdə savaşıb. Vüqar sentyabrın 30-da Füzuli rayonu Yuxarı Seyidəhmədli kəndi istiqamətində ordumuzun düşmən üzərinə hücumu zamanı şəhid olub. Şəhid Vüqar Məmmədov ölümündən sonra Azərbaycan Respublikasının Prezidenti cənab İlham Əliyevin Sərəncamına əsasən "Vətən uğrunda" və "Füzulinin azad olunmasına görə" medalları ilə təltif edilib. Elmira xanım oğlunun həyat və döyüş yolunun əks olunduğu, şəhidlərimizdən və onların qəhrəmanlıqlarından bəhs edən “Əbədiyyət yolu” və “Ölümsüzlər” adlı kitabları Mərkəzi Kitabxanaya hədiyyə edib. Görüşün sonunda qəhrəmanımızın ailəsi göstərdiyi diqqət və qayğıya görə Ölkə rəhbərliyinə təşəkkürünü bildirib.