Sumqayıt Regional Mədəniyyət İdarəsinə tabeli Qubadlı rayon Vasili Əliyev adına Rayon Mədəniyyət evi, Mahmudlu kənd Mədəniyyət evi ilə birgə Gənclər günü ilə əlaqədar “Heydər Əliyev ideyaları ilə parlayan gəncliyimiz” adlı konsert keçirilib. Tədbirdə Qubadlı Rayon İcra Hakimiyyətinin məsul işçiləri, Qubadlı rayon Gənclər və İdman İdarəsinin rəisi Natiq Abbasov, müəssisə rəhbərləri, Mədəniyyət işçiləri, Faiq Qasımov adına Mahmudlu kənd tam orta məktəbinin müəllim və şagird kollektivi iştirak ediblər. Tədbir “Dostlar” instrumental ansamblı tərəfindən ifa olunan kompozisiya ilə açıq elan olunub. Aparıcı ulu öndər Heydər Əliyevin gəncliyimiz haqqında söylədikləri fikirlərdən sitatlar gətirərək qeyd edib ki, hər bir gənc vətənin gələcəyi üçün əlindən gələni etməlidir. Sonda “Dostlar” instrumental ansamblının ifasında rəngarəng musiqi nömrələri, “Disko dans” Rəqs qrupunun maraqlı rəqsləri, bədii qiraət dərnəyinin üzvləri tərəfindən şeirlər, kompozisiya nümayiş olunub.