Sumqayıt Regional Mədəniyyət İdarəsinə tabeli Yaşıldərə yaşayış massivi Kitabxanasının əməkdaşları şəhidlərin xatirəsinin əbədiləşdirilməsi və şəhid ailələrinin hörmət və ehtiramla ziyarət edilməsi məqsədilə Azərbaycan Silahlı Qüvvələrinin əsgəri, Aprel döyuşlərinin iştirakçısı və Vətən müharibəsi şəhidi Vüqar İlqar oğlu Məmmədovun ailəsini ziyarət ediblər. Görüşdə şəhidin şərəfli döyüş yolundan söhbət edilib, qayğıları ilə maraqlanılıb, maddi və mənəvi dəstək olublar. Əsgər Məmmədov döyüşlərin ilk günlərindən etibarən müharibədə iştirak edərək, topçu vəzifəsində və manqa komandiri kimi xidmət göstərib. Vüqar Məmmədov 2020-ci ilin 9 oktyabr tarixində Füzuli şəhər mərkəzinin azad edilməsi uğrunda aparılan şiddətli döyüşlər zamanı düşmən snayperinin açdığı atəş nəticəsində həlak olub. Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulan tapşırıqların icrası zamanı vəzifə borcunu şərəflə yerinə yetirdiyinə görə Azərbaycan Respublikasının Prezidenti cənab İlham Əliyevin 15.12.2020-ci il tarixli Sərəncamına əsasən Vüqar Məmmədov ölümündən sonra "Vətən uğrunda" medalı ilə təltif edilib. Görüşün sonunda şəhidin ailəsi göstərilən diqqət və qayğıya görə Azərbaycan Respublikasının Prezidenti cənab İlham Əliyevə təşəkkürünü bildirib.

Allah şəhidlərimizə rəhmət eləsin!