Sumqayıt Regional Mədəniyyət İdarəsinə tabeli Qubadlı şəhər Əbülfəz Mehdiyev adına Uşaq Musiqi Məktəbinin müəllimləri Birinci Qarabağ müharibəsi qəhrəmanı şəhid Əbülfəz Bəbir oğlu Mehdiyevin ailəsini ziyarət ediblər. Görüş zamanı şəhidin keçdiyi şərəfli döyüş yolundan söhbət açılıb, ailəyə maddi və mənəvi dəstək göstərilib. Əbülfəz Bəbir oğlu Mehdiyev 1965-ci il noyabrın 1-də Qubadlı rayonunun Tarovlu kəndində anadan olub. O, 1987-ci ildən Azərbaycanın dilbər guşələrindən sayılan Qubadlı torpaqlarının müdafiəsinə qalxıb və bu məqsədlə xalqımızın qeyrətli oğlu Əliyar Əliyevin başçılıq etdiyi ərazi özünümüdafiə taboruna qəbul edilib. 1992-ci il iyun ayının 30-da doğma Tarovlu kəndinin müdafiəsi uğrunda gedən döyüş igid topçunun son döyüşü olub. Həmin gün düşmən böyük qüvvə ilə Tarovlu kəndinə hücum edib. Əlavə qüvvə köməyə gələnə qədər Əbülfəz dostu İrşad Həsənquliyevlə cəsarətlə döyüşə atılıb. Arxa-arxaya verən iki dost sayca xeyli üstün olan düşmənə qarşı mərdliklə vuruşub, dinc əhalini qəfil basqından xilas edib, 8 erməni quldurunu öldürüblər. Bir neçə saat davam edən bu qanlı döyüşdə Əbülfəz sinəsindən ağır yaralanıb və qəhrəmancasına həlak olub. Azərbaycan Respublikası Prezidentinin Sərəncamı ilə Mehdiyev Əbülfəz Bəbir oğlu "Vətən uğrunda" medalı ilə təltif olunub. Sonda şəhidin ailəsi onlara göstərilən diqqət və qayğıya görə ölkə başçısına təşəkkürünü bildirib.

Allah şəhidlərimizə rəhmət eləsin!