Sumqayıt Regional Mədəniyyət İdarəsinə tabeli S.Vurğun adına Mərkəzi Kitabxananın əməkdaşları Azərbaycan Silahlı Qüvvələrinin müddətdən artıq xidmət edən hərbi qulluqçusu, Vətən müharibəsi şəhidi Elçin Zamin oğlu Hüseynovun ailəsini ziyarət ediblər. Görüş zamanı şəhidin keçdiyi şərəfli döyüş yolundan söhbət açılıb, kollektiv tərəfindən ailəyə maddi və mənəvi dəstək göstərilib. Elçin 9 sentyabr 1992-ci ildə Bakı şəhərində anadan olub. O, orta təhsilinə 1999-cu ildə Sumqayıt şəhər 9 saylı tam orta məktəbdə başlayıb və 2012-ci ildə Sumqayıt Dövlət Texniki Kollecinin "Gömrük işi" fakültəsini bitirib.

Qəhrəmanımız 2016-cı ilin Aprel döyüşləri zamanı könüllü olaraq ön cəbhəyə yollanmaq barədə komandanlığa müraciət edib. Elçin Hüseynov Vətən müharibəsi zamanı Suqovuşan döyüşlərində vuruşaraq, yaralanıb. O yaralansa da döyüşə davam edib, "Mübariz" postundan digər posta adlayarkən qəhrəmancasına həlak olub və oktyabrın 17-də Sumqayıtın Şəhidlər xiyabanında dəfn edilib. Ölkə rəhbərinin müvafiq sərəncamlarına əsasən ölümündən sonra Elçin Zamin oğlu Hüseynov «Vətən uğrunda», «Suqovuşanın azad olunmasına görə», «Vətən müharibəsi iştirakçısı», «Ağdamın azad olunmasına görə» medalları ilə təltif edilib.

Sonda şəhidin ailəsi onlara göstərilən diqqət və qayğıya görə Ali Baş Komandan İlham Əliyevə və Birinci vitse-prezident Mehriban Əliyevaya öz minnətdarlığını bildirib.

Allah şəhidlərimizə rəhmət eləsin!