Sumqayıt Regional Mədəniyyət İdarəsinə tabeli Abşeron rayon Mərkəzi Kitabxanasının təşəbbüsü, Xırdalan bələdiyyəsi, Abşeron rayon Təmir Abadlıq İdarəsi və Xırdalan şəhər 2 nömrəli məktəbin birgə dəstəyi ilə Xırdalan şəhər Heydər Əliyev adına parkda Ümumdünya Təbiətin Mühafizəsi Cəmiyyətinin 74 illiyinə həsr olunan “Təmiz Abşeron naminə” devizi altında ağacəkmə aksiyası keçirilib.

Tədbirdə Sumqayıt Regional Mədəniyyət İdarəsinin rəisi Rəşad Əliyev, rəis müavini İlham Əhmədov, Xırdalan şəhər Bələdiyyəsinin sədri Orxan Musayev, Abşeron rayon Təmir Abadlıq İdarəsinin rəisi Mehman Səfərov kimi qonaqlar, Mərkəzi Kitabxananın direktor v.m.i.e. Esmira Şahbazova, kitabxana əməkdaşları, Xırdalan şəhər 2 nömrəli məktəbin müəlliməsi Gözəl Abbasova və onun şagirdləri iştirak ediblər. Aksiya işçiləri Heydər Əliyev parkında öncədən təyin olunan yerdə şam ağacları əkiblər. Daha sonra yaxınlıqdakı magistral yolda nəqliyyatın hərəkəti bir neçə dəqiqəlik saxlanılaraq, əllərində günün önəmini özündə əks etdirən xüsusi plakatlar tutan şagirdlər tərəfindən sürücülərə diqqəti təbiətin mühafizəsinə, yaşıllaşmaya, insan sağlamlığının qorunmasına çəkmək üçün hazırlanan braşuralar paylanılıb və müxtəlif şüarlar səsləndirilib.

Kitabxananın Xidmət şöbəsinin müdiri Xatirə Zeynalova iştirakçıların diqqətini tullantılardan hazırlanan əl işlərindən ibarət sərgiyə yönəldib və onlar tullantıların yenidən necə möhtəşəm şəkildə dəyər qazanmasının şahidi olublar. Sərgidə həmçinin ekologiya və ətraf mühitin mühafizəsi ilə bağlı kitablar da yer alıb.

Cəmiyyətin diqqətini təkrar emala, yaşıllıqların qorunmasına yönəltmək, atmosferi oksigenlə zənginləşdirmək və ekoloji vəziyyəti yaxşılaşdırmaq məqsədi daşıyan bu aksiya hamı tərəfindən böyük maraqla qarşılanıb. Sonda tədbirin təşkilatçısı Günel Cəbrayılova aksiya ilə bağlı fikirlərini ifadə etdikdən sonra Mərkəzi Kitabxananın direktor v.m.i.e Esmira xanım da öz növbəsində fəxri qonaqlara iştirak etdikləri üçün təşəkkür edərək, qeyd edib ki, daim təbiət və cəmiyyətin paralel şəkildə inkişafı diqqət mərkəzində olmalı və bunun üçün atılan addımlar yüksək qiymətləndirilməlidir. Bu səbəbdən aksiyanın baş tutmasında əməyi olan hər kəsi təbrik edib və bu yolda onlara davamiyyət arzu edib.