Sumqayıt Regional Mədəniyyət İdarəsinə tabeli M.Ə.Sabir adına Kitabxana filialı, Sumqayıt şəhər Mərkəzi Kitabxanın Dövrü Mətbuat və İncəsənət şöbəsinin əməkdaşları Aprel döyüşlərinin iştirakçısı və Vətən müharibəsi şəhidi Vüqar Məmmədovun ailəsini ziyarət edib, qayğıları ilə maraqlanıblar. Vüqar İlqar oğlu Məmmədov 9 yanvar 1994-cü ildə Sumqayıt şəhərində anadan olub. İkinci Qarabağ müharibəsi başladıqdan sonra könüllü olaraq Füzuli rayonu istiqamətindəki döyüşlərə yollanıb. Oktyabrın 8-dən 9-na keçən gecə Füzuli şəhər mərkəzinin, Əhmədbəyli kəndinin düşməndən azad edilməsi uğrunda şiddətli döyüşlər başlayıb. Azərbaycan Ordusunun mərd, mübariz əsgəri Vüqar da bu döyüşlərdə iştirak edərək, döyüş meydanında düşmənə qarşı cəsarətlə vuruşub, düşmənin neçə-neçə canlı qüvvəsini məhv edib və yaralı əsgərlərimizin döyüş meydanından çıxarılmasında yardımçı olub. O, düşmən snayperindən açılan atəş nəticəsində başından yaralanıb və qəhrəmancasına həlak olaraq, ən uca məqama şəhidlik zirvəsinə ucalıb. 9 oktyabr 2020-ci il tarixində Sumqayıt şəhər Şəhidlər Xiyabanında dəfn olunub. Ölümündən sonra Azərbaycan Respublikasının Prezidenti cənab İlham Əliyevin Sərəncamına əsasən “Füzulinin azad olunmasına görə” medalı ilə təltif olunub. Şəhidin anası Əsmər Məmmədova Ali Baş Komandan İlham Əliyev və Birinci vitse-prezident Mehriban xanım Əliyevanın şəhid ailələrini hər an diqqət mərkəzində saxladıqlarını vurğulayaraq, minnətdarlığını bildirib. Şəhid anası, həmçinin Sumqayıt şəhər rəhbərliyinə və Sumqayıt Regional Mədəniyyət İdarəsinin rəisinə göstərdikləri diqqət və qayğıya görə öz təşəkkürünü bildirib.

Allah şəhidlərimizə rəhmət eləsin!