Sumqayıt Regional Mədəniyyət İdarəsinə tabeli Abşeron rayon Mədəniyyət Mərkəzinin Novxanı kənd Sənətkarlıq klubu və MKS-nin Novxanı kənd Kitabxana filialının əməkdaşları Vətən müharibəsi qazisi Amil Faiq oğlu Əliyevin ailəsini ziyarət ediblər. Amil Əliyev 25 may 1998-ci ildə Abşeron rayon Novxanı kəndində anadan olub. 44 günlük Vətən müharibəsi zamanı Ağdərə, Suqovuşan istiqamətində şərəfli döyüş yolu keçib. Cəsur döyüşçü Ağdərə uğrunda gedən döyüşlərdə mina partlaması nəticəsində ağır yaralanıb. O, birbaşa helikopter ilə Bakı şəhərinin hospitalına gətirilib. Əfsuslar olsun ki, həkimlərin səylərinə baxmayaraq gözlərini xilas etmək mümkün olmayıb.

Azərbaycanın ərazi bütövlüyünün təmin edilməsi uğrunda igidlik və şücaət nümayiş etdirdiyinə görə Azərbaycan Respublikasının Prezidenti cənab İlham Əliyevin Sərəncamına əsasən Amil Əliyev "Suqovuşanın azad olunmasına görə", "Cəsur döyüşçü", "Vətən uğrunda" medalları ilə təltif edilib. Görüş zamanı qazimiz kitabxana və klub kollektivinə 44 günlük Vətən müharibəsi dövründə keçdiyi döyüş yolundan söz açıb. Əməkdaşlar ailənin qayğıları ilə maraqlanıb, maddi və mənəvi dəstək olublar.

Sonda xatirə şəkilləri çəkilib.

Allah şəhidlərimizə rəhmət eləsin, qazilərimizə şəfa versin!